Yon jij federal pase lòd Lendi bay ekip efikasite gouvènmantal Prezidan Donald Trump kreye ke milyadè Elon Musk ap dirije pou l pibliye tout dosye konsènan operasyon li yo ke jij la di ap dwoule an "sekrè ki pa nòmal".
Nan Washington, Jij Christopher Cooper te apiye posizyon gwoup Citizens for Responsibility and Ethics in Washington, yon gwoup ki veye aktivite gouvènman an, lè li jwenn ke Depatman Efikasite Gouvènmantal la (DOGE) se yon ajans ki oblije reponn konfòm Lwa Libète Enfòmasyon an (FOIA).
Desizyon sa a ki se premye desizyon konsa ki janm pran, make yon viktwa pou aktivis kap chache fòse DOGE vin pi transparan sou wòl li jwe nan revokasyon an mas kap fèt nan mitan fòs travay federal la epi demantibilasyon ajans gouvènman an ke administrasyon prezidan Repibliken an ap jere.
Administrasyon Trump la plenyen pou di DOGE fè pati branch Egzekitif Prezidan an e ke li pa oblije konfòme l ak FOIA, yon lwa ki pèmèt piblik la mande aksè ak dokiman ajans gouvènmantal yo pwodui.
Sepandan Cooper, yon jij ke Prezidan Demokrat Barack Obama te nomen, deklare DOGE ap egzèse "otorite endepandan sibstansyèl" ki pi plis pase tout lòt pati biwo a ki nòmalman ta gen eksepsyon anba lwa FOIA a.
Cooper di sanble DOGE "gen pouvwa non sèlman pou l evalye pwogram federal yo, men tou fè chanjman drastik e menm elimine yo konplètman." Jij la di ajans la pa demanti fè sa a.
Jij la ajoute "operasyon yo jiskaprezan dewoule nan yon sekrè ki pa nòmal". Li site rapò ki di kòmkwa DOGE ap sèvi ak yon sèvè "andeyò", ke anplwaye li yo refize idantifye tèt yo lè responsab de karyè yo mande yo sa epi y al sèvi ak app Signal ki kripte pou kominike.
Donald Sherman, direktè egzekitif gwoup CREW la bat bravo pou desizyon jij la. Li deklare: "Kounyea plis ke jamè, Ameriken merite transparans nan gouvènman yo."
Yon responsab Lamezonblanch di nan yon deklarasyon li pibliye ke jij la "pa konprann kijan DOGE fonksyone." Responsab la di Lamezonblanch atann ni aske Cooper ranvèse desizyon li, yon fwa li konprann estrikti DOGE la.
CREW te depoze yon dokiman legal devan tribinal 20 Fevriye pase a apre li te mande enfòmasyon sou operasyon DOGE la anba FOIA. Pami enfo li mande yo gen kominikasyon, kourye elektwonik entèn epi memo.
