Soti 14 fevriye pou rive 5 mas 2025, vyolans gwoup gang yo nan zòn metwopolitèn Pòtoprens lan fòse plis pase 42,000 moun kouri kite lakay yo.
Dapre yon yon dènye bilan Òganizasyon Entènasyonal pou Migrasyon (OIM) mete deyò jodi 6 mas 2025 lan, nan anviwon twa semèn, zak briganday gang yo nan kapital la fòse yon total 42,538 abitan kouri kite katye yo.
Se pi gwo deplasman masif nan zòn metwopolitèn Pòtoprens lan, selon sa OIM fè konnen.
Ajans Nasyonzini an souliye, mwatye nan moun k ap kouri yo soti nan komin Dèlma, tandiske 44% nan deplase yo, soti Pòtoprens.
Deplase yo soti nan plizyè komin nan depatman lwès la. Pòtoprens, Dèlma, Petyonvil elatriye.
Majorite moun ki deplase yo al refijye yo kay yon pwòch yo, selon OIM ki souliye rès deplase yo al viv nan kan ki fèt pou sa.
OIM ajoute, vag vyolans gwoup nèg ak zam yo fòse 9 sit, ki te gen ladan yo plis pase 18 mil moun, fèmen pòt yo. Sa ki vle di, anpil nan moun ki deplase yo se moun ki te kouri deja akoz atak gang yo.
Nouvo deplase sa yo vin ajoute sou plis pase yon milyon moun ki te kouri kite lakay yo pandan ane 2024 la, toujou akoz pwoblèm ensekirite a.
