Prezidan Konsèy Prezidansyèl Pwovizwa Ayisyen an, Leslie Voltaire voye yon lèt jodi 6 Mas la bay Sekretè-Jeneral Nasyonzuni Antonio Guterres kote li fè konnen li apiye plan misye te prezante devan Konsèy Sekirite a pa rapò ak fòs miltinasyonal la.
Nan lèt la, ke VOA wè, Voltaire di li espere Konsèy Sekirite LONU an va apwouve plan Guterres la paske ensekirite a an Ayiti trè preokipan.
Lèt Voltaire la, ki an Franse, di: " Konsèy prezidansyèl tranzisyon an... pote tout sipò li pou pwopozisyon ou fè a epi espere lap jwenn yon konsansis laj pami manm Konsèy Sekirite a."
Nan fen mwad Fevriye a, Guterres te prezante plan li bay manm Konsèy Sekirite LONU an. Plan sa a, ki sanble anpil ak plan li te prezante pou Somali, kote LONU pran responsabilite pou depans striktirèl ak lojistik ki nesesè pou mete fòs miltinasyonal la an plas. Yon trust fund ta jere salè manm fòs la.
Guterres di plan li se yon "opsyon reyalis" e ke konvèti fòs miltinasyonal la an operasyon mentyen lapè LONU pa yon opsyon vyab."
Men Lachin ak Larisi opoze ide sa a.
Pandan yon vizit nan Repiblik Dominiken 6 Fevriye, Sekrete d Eta Ameriken Marco Rubio te deklare: "mwen ta renmen di klèman ke se pèp Ayisyen ki va detèmine avni Ayiti. Yomenm ak boujwa yo dwe deside epi byen reflechi sou ki kalite avni yo vle paske se peyi pa yo e avni a se pou yo. Men Etazini pral ede."
Rubio te fè konnen apre Prezidan Donald Trump te bloke asistans etranje, li te siyen yon eksepsyon pou Ayiti ki te debloke asistans Ameriken pou fòs miltinasyonal la.
Pandansetan, gang ame yo kontwole 85 pousan Potoprens ak katye ozalantou yo. Atak gang yo lakoz plis pase 6,000 moun te oblije kite kay yo pandan mwad Fevriye a.
Fos sekirite miltinasyonal Kenya ap dirije an Ayiti, gen 1,000 manm kounyea. Pi fò pami yo se polisye Kenyan men plan an mande pou fòs la gen 2,500 manm.
Se yon trust fund LONU tabli ki konte sou kontribisyon volontè ki finanse misyon MMSS la. Li te gen ladann $110,8 milyon ladann nan mwad Fevriye a.
Guterres di yo bezwen plis lajan.
Korespondan VOA nan Nasyonzini Margaret Besheer kontribye a repotaj sa a. Kek enfomasyon soti nan AP ak Reuters.
