Lajistis Etazini akize ofisyèlman yon lidè gang puisan Ayisyen an koneksyon ak kidnaping yon koup Ameriken epi lanmò yon dam.
Otorite Ameriken yo anonse nouvèl la Madi.
Matthew Michel Graves se Pwokirè Gouvènman Washington DC a.
"Jodia biwo pwokirè Washington DC a ak biwo FBI nan Miami an, anonse mezi adisyonèl lap pran pou reponn zak vyolans gang yo ap komèt kont sitwayen Ameriken an Ayiti. Ayiti ap fè fas ak yon kriz imanitè. Sivil inosan e menm sitwayen Ameriken ap fè fas ak menas lanmo si yo pa peye yon ranson tèt nèg. Lidè gang yo ap opere ak enpinite. Gang yo kontribye a epi agrave kriz imanitè a epitou destabilize enstitisyon politik yo."
Biwo Pwokirè Gouvènman Washington DC a anonse enkilpasyon Vitel'homme Innocent, ki se lidè gang Kraze Baryè a, an koneksyon ak kidnapping Jean Franklin ak Marie Odette Franklin nan mwad Oktob 2022. Yo te tire e touye Marie Franklin pandan kidnaping nan. Yo te kenbe Jean pandan 21 jou.
"Biwo nou te akize Vitel'homme ane pase a pou wòl li te jwe nan kidnaping 16 misyone Kretyen pami yo 5 timoun, youn pami yo te gen 8 mwa sèlman," Graves deklare.
Otorite Ameriken yo ofri yon rekonpans $1 milyon pou enfòmasyon ki ka debouche sou arestasyon misye. Anvan sa yo te akize l an koneksyon ak kidnapping yon gwoup misyonè Kretyen an 2021.
Depatman Jistis Etazini akize Vitel'homme Innocent dèske li te konplote pou kidnape yon moun ki te debouche sou lanmò moun nan, ke li te ede moun ki pran viktim yo ann otaj, epi tantativ kidnaping ki te lakoz yon moun te mouri.
