Prezime bandi gang 400 Mawozo Jean Pelice, alyas "Zo" te sipoze genyen yon odisyon devan tribinal federal nan Washington D.C. apremidi a a 1 hè. Odisyon an anile, e kounyea misye ap tann dewoulman pwosè li.
Pelice deja plede non koupab a akizasyon la jistis Etazini pote kont li an koneksyon ak kidnaping 16 misyonè Ameriken ann Ayiti nan mwad Oktòb ane pase a. Gen 7 chèf d'akizasyon kap peze kont li - youn se konplo pou kidnape moun epi kenbe yo ann otaj, lòt yo se pou kidnapping. Dokiman legal VOA Kreyòl we, bay detay presi sou kidnaping misyonè yo, konvèsasyon ant manm gang yo, ranson yo te mande ak tout deplasman otaj yo jiskaske yo te libere.
Dapre lwa peyi Etazini, penalite pou kidnapping se yon minimòm de 20 an nan prizon.
Pelice se youn pami 3 prezime bandi 400 Mawozo Etazini transfere Washington.
Germine Joly, alyas Yonyon, fèmen nan prizon nan Washington tou.
Pandan wiken nan, Polis Nasyonal Ayiti te anonse sou kont Facebook li ke li te remèt bay FBI Maxony Germinal, ke PNH dekri tankou founisè zam gang 400 Mawozo. Yo te arete misye depi Avril nan moman li tapral travèse fwontyè Ayiti pou al Repiblik Dominiken.
Depatman jistis Etazini pa reponn kesyon VOA Kreyòl pa rapò ak transfè Maxony Germinal nan Washington.
Sepandan nan yon entevyou videyo ak yon chèn televizyon Ayisyèn misye fè konnen li nan yon otèl nan Washington, pa nan prizon e ke li vini Ozetazini kòm temwen pa akize. VOA Kreyòl mande FBI konfime deklarasyon sa a, nou pa jwenn repons.
