Lamezonblanch ak Depatman Deta fè deklarasyon sou Ayiti Madi.
Pòt pawòl Konsèy Sekirite Nasyonal Lamezoblanch la John Kirby fe konnen Prezidan Joe Biden ranseye sou ka anlèvman enfimyè Ameriken nan an Ayiti.
"Tout sa mwen ka diw se ke nap travay du sou ka sa a. Nou vle liberasyon ni. Nou vle wè l tounen lakay li ak fanmi ni. Men ankò mwen kwè bagay pi pridan ke nou kapab fè se pa pale piblikman sou jefò sa yo an detay paske sityasyon an toujou prekèr. Donk nou trez o kouran de ka li epi rekonesan dèske li gen yon timoun piti avè l. E nap fè tout sa nou kapab pou jwenn liberasyon l."
Pa lwen Mezonblanch la, nan Depatman Deta, pòt pawòl Matthew Miller pat vle di si bandi yo fè demann bò kote gouvènman Ameriken an.
"Mwen pa kwe li ta apwopriye pou m fè komante sou detay ka a. Nou pa dwe entèprete sa okenn fason, ni eseye devinnen kisa repons la ye. Se paske ankèt la ap rapousuiv e byen antandu gen kestyon sansib ke mwen pa vle fè komantè sou yo."
Jounalis yo mande si gen koneksyon ant anons Depatman Deta fè ke lap rale anplwaye non-esansyel yo soti Ayiti ak anlèvman an.
" Pa gen okenn rezon pou kwè yo konekte."
Miller ajoute sityasyon Ayiti difisil depi kèk tan.
" Sityasyon Ayiti poze defi depi lontan. Se pa yon sekrè. Nou pale ouvètman sou sa. Nou rekòmande pou sitwayen Ameriken pa vwayaje Ayiti depi kèk tan. Nou fikse kom priyorite jefò pou jwenn yon peyi pou dirije fòs miltinasyonal la. Sa poze defi. Nou fè plizyè konvesasyon, kèk ki piblik kèk ki pa piblik sou kestyon an. Men map di ke nou kontan, jan sekretè a di nan deklarasyon nou pibliye a ke Kenya pran devan e nap konsidere yon fason pozitif òf li pou l jwe wòl sa a."
Jounalis yo mande poukisa Etazini pat vle dirije fos entèvansyon an.
" Nou te kwè gen anpil lòt fason pi itil ak pi apwopriye ke nou taka apiye jefò a olye nou dirije l noumenm. Nou pran angajman vizavi sekirite pèp Ayisyen an. Nou fe kado yon pakèt asistans imanite ke nap bay Ayiti depi kèk tan. E nou travay dèyè pòt fèmen pou jwenn yon nasyon pou dirije fòs miltinasyonal la e nou kontan ke jefò a jwenn siksè."
Enfomasyon pou repotaj sa a soti nan Associated Press
