Lame Etazini akize solda Travis King pou krim, pran depi sove kite kan li pou l jete kò li nan Kore di Nò nan mwa Jiyè a, rive nan fè vwadfè sou solda parèy li ak chache pònografi timoun, dapre dokiman ke ajans nouvèl Reuters jwenn.
Akizasyon kont King nan, ke lame a pa te rapòte anvan sa, gen 8 pwen diferan nan kad Jistis Militè kont moun ki pote Inifòm Militè a, sa ki ap mennen nan gwo batay legal pou solda 23 lane a, apre Kore di Nò te fin lage l nan mwa Septanm nan.
Lame a pa te reponn touswit yon demann pou pale sou kesyon an.
Nan yon deklarasyon ke pòtpawol fanmi li bay, manman King ki se Claudine Gates mande pou pitit gason li « benefisye inonsans toutotan yo pa jwenn li koupab. »
Kore di Nò te lage li nan mwa Septanm apre dè semenn kote gouvènman peyi Swèd te negosye pou fè lage King, fè li janbe fwontyè pou antre an Chin epi remèt li bay anbasadè ameriken an.
