Otorite Ameriken yo di Pyongyang pa reponn okenn kominikasyon militè Ameriken sou dosye sòlda a.
Medya leta Kore di Nò yo, ki te konn rapòte chak fwa lame a mete men sou sitwayen ameriken, yo menm tou pa pale sou ensidan an jiskaprezan.
Gouvènman Ameriken an pa sanble fè gwo pwogrè nan efò pou konnen sò sòlda a.
Nan Wisconsin, fanmi King pale ak laprès Mèkredi 19 jiyè 2023 sou dosye a.
Manman Travis King, Claudine Gates, te pale devan lakay li kote li mande pou moun priye pou pitit gason l retounen an sekirite. "Mwen sèlman vle pitit gason m tounen. Mwen sèlman vle pitit gason m' tounen lakay”.
King, ki gen 23 lane, te nan yon gwoup vizitè sivil sou fwontyè a lè toudenkou li kouri epi janbe Liy Delimitarize ki separe 2 peyi yo.
