Minis Jistis ak Sekirite piblik la, Patrick Pélissier, mande Mario Andrésol pou l sipèvize operasyon sekirite k ap fèt kont bandi yo nan zòn metwopolitèn Pòtoprens la ak depatman Latibonit.
Daprè enfòmasyon yo, desizyon minis Pélissier a makonnen ak aplikasyon yon estrateji sekirite Konsèy siperyè sekirite polis nasyonal la (CSPN) te adopte.
Mario Andrésol, ki se Sekretè Deta Sekirite piblik, ap gen pou l founi bay CSPN yon rapò sou evolisyon sitiyasyon an sou teren an, chak semèn.
Rapò sila a ap gen ladann tout kalte enfòmasyon itil ki kapab pèmèt yo evalye operasyon yo, tankou efikasite dispozisyon responsab yo pran, gwo difikilte yo rankontre, elatriye.