Prezidan ameriken an, Joe Biden, toujou teste pozitif pou KOVID-19; sepandan li santi l byen e li pa gen lafyèv ankò, dapre yon deklarasyon medsen li, Doktè Kevin O’Connor, pibliye.
O’Connor fè konnen Biden te fè yon egzèsis fizik lejè anvan li te fè yon egzamen mèkredi maten. Dapre li, Prezidan an ap jere yon tous ki ale, ki vini, men pa avèk menm frekans ke pandan jounen anvan an. Tanperati Biden, presyon ateryèl li, ritm respiratwa li ak nivo ogsijèn nan san li rete nòmal tandiske poumou l yo klè toujou.
Lide ameriken an pral kontinye rete nan yon izòlman total, pandan l ap rekipere anba malady a ki retounen apre yo te detekte l yon 2èm fwa nan dat 30 jiyè a.
Bidne teste pozitif pou KOVID-19 pou lapremye fwa nan fen mwa jiyè a epi, nan dat 27 jiyè a, doktè te wete nan izòlman an
Depi Prezidan Biden te reteste pozitif la, li anile yon vwayaj nan Eta Michigan plis yon 2èm ki te dwe mennen li lakay li nan Eta Delaware. Nan sware lendi premye out la, li te pran lapawòl devan yon ti gwoup jounalis sou eliminasyon lidè al-Kayda a, Ayman al-Zawahiri.