Doktè Prezidan k ap swaye Prezidan Joe Biden, Kevin O'Connor, di lidè ameriken an kontinye fè "gwo amelyorasyon" malgre gòj li toujou ap fè l mal.
Biden te teste pozitif pou kowonaviris la jedi pase a; depi lè a l ap pran yon medikaman anti-viral ki rele Paxlovid.
Kowòdonatè Lamezonblanch pou KOVID-19 la, Doktè Ashisha Jha, di Biden santi l "pi byen anpil-anpil." Doktè Jha ajoute: "Gras a Dye, vaksen nou yo ak terapi nou yo mache byen kont kowonaviris."
Responsab yo mete aksan sou le fèt ke sentòm Biden yo leje paske li te deja resevwa 4 doz vaksen KOVID-19 la epi li kòmanse pran Paxlovid.
Doktè O'Connor te fè konnen samdi ke prezidan an pwobableman enfekte ak varyan ki rele BA.5 la ki kontaje anpil e k ap pwopaje trè vit Ozetazini.
Doktè Jha, bò kote pa l, konfime dimanch ke "se varyan BA.5 la" Prezidan Biden trape.
