Prezidan Joe Biden teste pozitif pou COVID-19 pou dezyèm jou youn apre lòt, nan sak sanble se yon ka "rebon" kowonaviris la apre tretman li ak yon medikaman anti-viral.
Doktè Lamezonblanch la, Kevin O'Connor ekri nan yon lèt ki pibliye Dimanch ke prezidan an "kontinye santi'l byen" e ke li pral kontinye travay depi rezidans egzekitif la.
Apre Biden te teste pozitif Samdi, li te anile plan li te genyen pou'l vwayaje ak asiste evenman fas-a-fas. Li an izolman pou omwens 5 jou dapre sa Sant pou Kontwòl ak Prevansyon Maladi a konseye moun fè.
Prezidan Biden gen 79 an e li te teste pozitif pou COVID-19 21 Jiyè. Li te resevwa tretman ak yon medikaman ki rele Paxlovid, e li te mete fen nan izolman li Mèkredi.
