Konsèvatè liy-du Jim Jordan di kòlèg Repibliken-li-yo ke li ap sispann kandidati-li pou lidè Chanm Reprezantan Etazini-an epi apiye Repibliken Patrick Henry pou-l ranpli wòl-la pou yon bout tan, se sa palmantè di jodi jedi-a.
Chanm Reprezantan-an pa gen lidè depi plis pase 2 semenn, e Jordan 2 fwa echwe nan efò pou-l te pran 217 vòt ke li te bezwen pou-l pran mayèt lidè-a, akoz opozisyon ke li jwenn bò kote Demokrat-yo ak plis pase 20 kòlèg Repibliken.
Lè yo te mande-li sa ki te espere, lè li t-ap antre nan yon reyinyon ak pòt-fèmen ak lòt Repibliken, Jordan te di sèlman, “Mwen p-ap konnen jouk mwen pale ak kòlèg mwen yo.”
Nan reyinyon sa-a, Jordan di li p-ap chache yon 3èm vòt pou li ka pran pòs-la e ke olye de sa, li pwal ankadre McHenry pou-l kenbe plas-la jouk rive nan mwa Janvye, dapre Depite Repiblikwn Jim Banks.
McHenry kounye-a se lidè pwovizwa Kongrè a.
Chwa sa-a, ke Demokrat-yo tou di yo ta ka sipòte, ta pèmèt palmantè-yo tounen nan travay. Prezidan Demokrat Joe Biden gen pou-l mande Kongrè-a semenn sa-a pou apwouve yon afè 60 milya dola pou Ikrèn ak 10 milya dola pou Izrayèl, e finansman pou operasyon gouvènman-an gen pou ekspire nan mwens ke yon mwa.
Li pa te klè si Jordan, ke ansyen Prezidan Donald Trump apiye, ap abandone kandidati-li nèt pou lidè Chanm-nan, oubyen si l-ap kontinye bati sipò nan mitan Repibliken-yo.
