Repibliken Jim Jordan ki koze anpil tubulans nan Kongrè a pa ranpòte ase vot pou tounen nouvo lidè Lachanm Depite a. Pòs sa a pami pòs ki gen plis pouvwa nan Washington.
Vot la dewoule Madi.
Gen omwens 9 Repibliken ki vote kont misye kidonk li pap gen 217 vwa li bezwen pou ranpòte lidèship la. Yo pral òganize plizyè lòt vot si Jordan echwe nan premye tantativ li.
Si li pa resi pran tèt Repibliken yo pou chwazi l kòm nouvo lidè yo, depite eta Ohio a, ki pase plizyè zane ap goumen ak lidè pwop pati li a, takab nan yon posizyon ki mete l nan 2èm pozisyon sou lis siksesyon an si yon bagay ta rive prezidan an.
Repibliken yo kontwole chanm bas palman Etazini e yo nomen Jordan kom ranplasan pou Kevin McCarthy ke yon ti gwoup Repibliken zèl dwat te dechouke 3 Oktob pase a.
Depite Repibliken Elise Stefanik dekri Jordan tankou yon "patriyòt, yon gerye Amerik an Premye ki ranpòte batay ki pi difisil yo."
Sepandan gen plizyè Repibliken ki deside vote pito pou swa McCarthy, swa Steve Scalise, ki se lidè Majorite Repibliken Lachanm nan e ki te echwe nan tantativ pa li pou tounen prezidan Lachanm semèn pase a.
