Gen 2 bwat kote moun ka depoze bilten vot yo ki sibi domaj nan rejyon Nòdwès Pasifik Etazini. Otorite yo sispek yon moun fè ekspre mete dife ladan yo, yon semèn sèlman anvan jounen eleksyon an. Gen plizyè santèn bilten vot ki detwi nan Vancouver, eta Washington.
Lòt ensidan an dewoule nan eta vwazen Oregon, nan vil Portland. Sanble yon sistèm pou siprime dife te byen mache epi anpeche dife a pwopaje. Gen 3 bilten vòt sèlman ki andomaje nan ensidan sa a. Otorite yo ap revize videyo kamera siveyans yo anrejistre pou eseye idantifye moun ki responsab.
Men sak pase, e kijan règleman ak mezi sekirite pa rapò ak bwat kote moun ka depoze bilten vòt yo toupatou nan peyi Etazini fonksyone.
Kisa nou konnen?
Lapolis di "aparèy pou mete dife" te koze ensandi nan bwat vot yo nan Portland ak Vancouver. Otorite yo di prèv yo jwenn montre dife yo lye youn ak lot e ke yo gen rapò ak yon ensidan ki dewoule 8 Oktòb kote yon moun te mete yon aparèy pou mete dife nan yon lòt bwat vòt nan vil Vancouver.
Direktè Eleksyon Awondisman Multnomah, Tim Scott deklare biwo li gen entansyon kontake 3 elektè ke bilten yo te andomaje epi ede yo ranplase yo.
Nan Vancouver, plizyè santèn bilten te pèdi nan Sant Tranzit Fisher's Landing lè sistèm pou siprime dife bwat la pat fonksyone jan li te sipoze fonksyon. Otorite Awondisman Clark, Greg Kimsey di yo te vide bwat la a 11 zè Samdi maten. Yo te mande elektè ki te depoze bilten yo nan bwat sa a pou yo kontakte biwo a pou ranpli yon nouvo bilten.
Biwo a di li pral kolekte bilten vòt yo pi soufan kounyea epi chanje lè koleksyon nan aswè pou anpeche bwat yo rete chaje ak bilten lanuit, lè li pi fasil pou moun ki gen move entansyon vinn fè magouy.
Kimsey dekri dife a tankou "yon atak dirèk kont demokrasi."