Eleksyon prezidansyèl Etazini an, ki chaje ak zizani pral dewoule nan yon semèn.
Vis Prezidan Kamala Harris, ki se kandida prezidansyèl pati Demokrat la, pare pou l pwononse yon swadizan "agiman fèmti" pou elektè yo Madi swa nan yon diskou li pral bay tou pre Mezonblanch la.
Ansyen prezidan Repibliken Donald Trump ap mennen kanpay nan Pènsilvani limenm. Eta sa a se youn pami 7 eta "chan d batay" politik ki gen anpil chans pou deside kiyès kap genyen eleksyon an.
Tou le 2 kandida yo ap denigre youn lot epi di advèsè yo pa an mezi pou pran pouvwa a pandan 4 an kap vini yo. Yap chache nempot ki ti avantaj pou lolo ti gwoup elektè ki poko finn deside kiyès yo pral apiye nan sa ki kapab youn nan eleksyon pi sere peyi Etazini janm konstate depi plizyè dizèn lane.
Sondaj opinyuon yo endike kous la sere-sere. Harris ak Trump egal ego nan kèk eta enpotan oubyen youn devan lot la pa yon ti maj tou mens, ki tonbe nan kad erè statistik. Kèk milye vot nan 7 eta kle yo taka jwe yon wol kle.
Diskou Harris ak Trump ap bay an dènye hè taka chanje lide elektè ki poko finn deside men jefo kanpay yo lanse pou ankouraje moun al vote vize moun ki deja pran angajman pou apiye yo nan dènye jou kanpay la oubyen jounen eleksyon an. Moun sa yo taka jwe yon wol pi desizif toujou.
Prèske 49 milyon moun vote bonè swa nan biwo d vot oubyen pa lapos, anvan dewoulman eleksyon Madi a, ki se jou eleksyon ofisyèl la. Se sa Laboratwa Eleksyon Inivèsite Florid la fè konnen. LI jwenn plis pase 155 milyon Ameriken te vote nan eleksyon 2020 an.
Anvan li t al Allentown, Pènsilvani, yon vil ki gen yon majorite abitan Latino, Trump te pran la pawol devan kay li, Mar-a-Lago ki sitye bo lanmè nan eta Florid. Li dekri Harris kom "seryezman enkonpetant - yon dezas total".
Men Trump pa reponn okenn kestyon jounalis yo e li pa mansyone non plis komedyen Tony Hinchcliffe ki te fè yon blag pandan miting politik li Dimanch nan Madison Square Garden nan Nouyok. Komedyen an te deklare teritwa Ameriken Potoriko se yon zile fatra kap flote nan lanmè.
Kanpay Trump la ekate l ak blag la. Trump pa fè komantè piblikman sou komantè a men li di ABC News li pa konn Hinchcliffe. Li deklare "Gen yon moun ki mete l la. Mwen pa konnen kiyès sa ye."
Trump ensiste pou di tou li pat tande blag la, malgre yo jwe l nan televizyon anpil fwa epi anpil atik parèt sou li. Lè jounalis yo mande l kijan li wè blag la li pat pwofite opotinite pou l denonse l. Li repete pito ke li pat tande l.
Trump di miting Nouyok la te yon "festival lanmou absoli".
Potoriken kap viv sou zile an kestyon an se sitwayen Ameriken men yo paka vote nan eleksyon an paske se sèlman sitwayen Ameriken ki abite nan eta Ameriken pa teritwa yo ki ka vote nan eleksyon prezidansyèl yo. Men plizyè santèn milye moun ki grandi sou zile a ap viv kounyea nan divès eta Ameriken e yo gan paran ak fanmi nan eta sa yo tou kivledi yo ka vote nan eta kote yo rete a.
Yon responsab kanpay Harris la di NBC News ke yon reklam 30 segonnn pral komanse difize nan eta chan d batay yo sou platfom tankou YouTube TV, Hulu, epi Snapchat kote anpil Latino fè nouvèl.
Nan eta Pènsilvani poukount li, ke tou le 2 kandida yo konsidere esansyèl pou ranpote prezidans la, gen plis pase 300,000 elektè Potoriken ki elijib pou vote, dapre rezo done Latino Data Hub nan Inivèsite Kalifoni Los Angeles.
Gen anpil Potoriken kap viv tou nan Kawolin di No, Wisconsin, ak Michigan, 3 lot eta chan d batay.
Jounalis VOA ki espeysalize nan politik, Ken Bredemeier ekri vesyon orijinal repotaj sa a
