Kou Siprèm Etazini pèmèt Mèkredi eta Vijini kontinye pije rejis elektè ke eta a di vize anpeche moun ki pa sitwayen Ameriken vote nan eleksyon prezidansyèl la.
Jij yo, malgre pwotestasyon 3 jij liberal ki fè pati Kou Siprèm nan, apwouve apèl ijan administrasyon Repibliken eta Viniji a fè. Gouvènè eta sa a rele Glenn Youngkin. Tribinal la pa esplike poukisa li pran mezi sa a, ki se yon bagay yo tipikman konn fè lè gen yon apèl ijan.
Jij yo pase a l aksyon sou apèl Vijini an apre yon jij federal te jwenn ke eta a te efase ilegalman non plis pase 1,600 elektè ki te sou rejis yo pandan 2 mwa ki pase yo.
Yon kou dapèl federal te kite desizyon yon jij te pran pou anpeche eta a fè sa, jan l ye a.
Desizyon konsa ra pa rapo ak eleksyon AMeriken yo men koze imigran kap vote ilegalman an fè pati mesaj politik kanpay ansyen Prezidan Donald Trump ak lot Repibliken.
Trump te kritike desizyon tribinal la te pran anvan sa kom " komplètman inakseptab" sou rezo sosyal yo.
Trump te deklare: "Se sitwayen Ameriken sèlman ki dwe vote."
Depatman Jistis Etazini ak yon kowalisyon gwoup prive te asiyen Vijini nan komansman mwad Oktob la epi bay kom rezon le fèt ke responsab elektoral Vijini ap egzekite yon lod egzekitif ke Gouvènè Youngkin te pase nan mwad Out la. Yo di eliminasyon non sa yo sou rejis elektè yo se yon vyolasyon lwa elektoral federal yo.
Ako Anrejistreman Nasyonal Elektè yo mande yon peryod "kalm" 90 jou anvan dewoulman eleksyon an pou mentni rejis elektè yo pou ke yo pa wetire non elektè lejitim sou rejis yo akoz erè biwokratik a la dènyè minit ke yo paka korije rapidman.
Youngkin pibliye lod li a 7 Out, ki se 90èm jou anvan eleksyon an. Li te mande pou Depatman Otomobilis eta a tcheke done yo chak jou epi konpare yo ak rejis elektè yo pou idantifye moun ki pa sitwayen Ameriken.
Jij Patricia Giles te di responsab elektoral yo te toujou ka wetire non moun men pa efase yo sistematikman. Dosye tribinal yo endike gen omwens kèk moun ke yo wetire sou rejis yo ki se sitwayen Ameriken.
Giles te pase lod pou eta Vijini notifye elektè ki afekte yo ansanm ak responsab rejis lokal yo anvan Mèkredi pou yo ka re-mete non yo sou lis yo.
Gen prèske 6 milyon moun Vijini ki enskri pou vote.
Nan yon pwosè parèy nan eta Alabama yon jij federal te pase lod mwa sa a pou eta a retabli elijibilite plis pase 3,200 elektè ke yo te di pat elijib pou vote paske yo pa sitwayen Ameriken. Temwayaj responsab eta yo nan dosye sa a te montre apepre 2,00 pami 3,251 elektè ke yo te wetire sou rejis la te aktyèlman sitwayen Ameriken ki gen papye legal pou pwouve sa.