Nou mande Depite Cherfilus-McCormick si li pa pè pou sipò Etazini pou fòs miltinasyonal la pa bay moun enpresyon misyon sekirite a la pou apiye Ariel Henry.
Depite Cherfilus-McCormick reponn:
"Absoliman pa. Youn nan bagay ke nap negosye se pou gen yon gouvènman tranzisyon oubyen pou Ariel Henry gen posibilite pou l kite pouvwa a. Mwen te menm mande pou Ariel Henry demisyone.
Nou pap bay Ariel Henry okenn sipò paske peyi a nan eta sa a anba lidèship Ariel Henry. Onètman palan fòk mwen di w mwen pa gen konfyans misye pa enplike ladann (pwoblèm peyi a) non plis tou. Donk misyon sa a pa la pou apiye Ariel Henry okenn fason ditou. Pa ditou.
"Men fòk nou kontinye travay sou gouvènans epi mete an plas yon gouvènman tranzisyon, yon gouvènman onèt pou ke nou ka òganize eleksyon. Mwen pa kwè gouvènman an e mwen pa kwè misyon sekirite a ap gen siskè ak Ariel Henry an plas epi san yon gouvènman tranzisyon.
"Mwen ta pito yon gouvènman tranzisyon san Ariel Henry. Sa se opinyon pèsonèl mwen paske li se sous pwoblèm nan e mwen pa wè Ariel Henry fè okenn bagay pou pwoteje pèp Ayisyen an."
Depite Sheila Cherfilus-McCormick te pale ak VOA Kreyòl sou Zoom. Nou va bay plis detay sou konvèsasyon an nan Randevou a 4pm (EST - lè Ayiti ak Washington).