Ansyen direktè Biwo Federal Envestigasyon an (FBI) James Comey, kritike Prezidan Donald Trump ki, dapre li, ap minen travay ajans ke li menm, James Comey, te dirije a. Misye Comey eksprime mekontantman li kont lidè ameriken an apre li te akize Misye Bush deske l ap bay menti e li pa respekte lalwa.
Ansyen direktè FBI la fè kòmantè negatif sa yo sou Prezidan Trump lendi 17 desanm 2018 la apre li te fin reponn kesyon komisyon jidisyè Chanm Depite a nan yon seyans ki te dewoule ak tout pòt fèmen. James Comey deklare:
“Repitasyon ajans FBI pran yon gwo kou paske prezidan ameriken an avèk akolit li yo pa janm sispann bay manti sou ajans la. Akoz tout manti sa yo, anpil moun onèt k ap gade sa moun ap di nan rezo nouvèl yo kwè nan non-sans sa yo. Sa se yon trajedi ki pral korije petèt, men dega ki fèt la pa gen anyen pou wè avèk mwen.”
Msye Comey fache tou kont lidè repibliken yo ki, daprè li, pè twòp pou yo leve-kanpe devan Prezidan Trump ak patizan li yo. Pòtpawèl Mezon Blanch-la, Sarah Huckabee Sanders, reponn sou kont Tweeter li byen ta lendi 17 desanm nan pou l di Repibliken yo dwe kanpe djanm devan Comey pou yo denonse pakèt zak koripsyon grav li poz yo. Madan Sanders ajoute prezidan an te rann peyi a yon bon sèvis lè l te revoke Comey epi ekspoze devan je piblik la fwòd san wont li komèt yo.
Misye Trump te revoke James Comey an 2017 apre ansyen direktè FBI la te refize pwowmèt pou l rete fidèl anvè prezidan an epi mete fen nan ankèt biwo pwokirè espesyal la, Robert Mueller, t ap mennen sou kesyon pou konnen ki konbinezon posib ki te genyen ant responsab kanpay elektoral Trump la avèk Larisi pou enfliyanse rezilta eleksyon prezidansyèl 2016 la Ozetazini. Revokasyon Comey a se youn nan desizyon ki nan mitan ankèt pwokirè espesyal Mueller ap mennen an.
Pou sa k konsènen seyans depozisyon lendi a, James Comey fè laprès konnen se yon tantativ dezespere Repibliken yo fè pou yo jwenn yon bagay kèlkonk yo ka itilize pou yo atake enstitisyon lajistis k ap mennen ankèt sou prezidan an.