Nan Washington, ansyen konseye sekirite nasyonal Prezidan Donald Trump, Michael Flynn, konparèt devan yon jij federal madi a 18 desanm 2018 la pou l te fè fas ak sanstans li poutèt kontak li te genyan avek Larisi kèk semèn sèlman anvan misye Trump te monte sou pouvwa a nan mwa janvye 2017.
Misye Flynn -ki se yon jeneral retrete nan Fòs Zame Lèzetazini an-- te rive nan tribinal la an menm tan ke yon gwoup moun ki t ap aplodi li, tandiske anpil lòt t ap rele chalbari dèyè l.
Pwokirè espesyal Robert Mueller te fè lajistis rekòmandasyon pou yo pa bay akize a okenn santans prizon, paske li pote yon kowoperasyon total-kapital bay jij denstriksyon k ap mennen ankèt sou koneksyon ak Larisi a menmsi jij la, Mèt Emmet Sullivan, gen tout libète pou l pran desizyon li vle sou afè a.
Kèk èd-tan anvan Michael Flynn te rive nan tribinal la, Prezidan Trump te ekri sou kont Tweeter li yon nòt kote li swete ansyen konseye sekirite nasyonal li a bòn chans. Nan nòt la, lidè ameriken an di li enteresan pou moun konnen kisa Michael Flynn genyen pou l di tribinal la; li ajoute, yon fwa ankò, pa t gen okenn konbinezon ditou-ditou ant responsab kanpay li a avèk Larisi.
Nouvèl ki parèt nan kòmansman mitan apre-midi a fè konnen Jij Emmet Sullivan aksepte yon rekèt avoka defans yo ki mande yon ranvwa seyans kote jij la pral deside ki santans l ap bay Flynn. Daprè espesyalis yo, sitiyasyon akize a pa briyan ditou-ditou, puiske nan seyans madi 18 desanm nan, Jij Sullivan pat mete dlo nan bouch li pou l repwoche Michael Flynn le fet ke l poze yon krim ki grav anpil:
<<Mwen pa kapab kache degou mwen, mepri mwen pou ou poutèt movez aksyon, aksyon vilen ou poze yo.>>
Lè Jij Sullivan pale de move zaksyon, aksyon vilan Michael Flynn poze yo, li vle fè sonje misye te bay manti lè l t ap bay ajan federal enfomasyon sou kontak li te pran avèk Larisi kèk semèn sèlman anvan Prezidan Donald Trump te prete sèman kòm prezidan Lèzetazini.
