Trump di FBI Fouye Kay li, Mar-a-Lago

FBI fouye kay ansyen Prezidan Donald Trump la ki rele Mar-a-Lago nan kad yon ankèt sou kestyon pou konnen si li te pote dosye sekrè soti nan Lamezonblanch pou sere yo nan rezidans li nan Florid.

Enfòmasyon sa a soti bò kote moun ki familye ak koze a, ki te pale ak Associated Press sou kondisyon pou yo pa site non yo.

Trump di ajan yo kase yon kof fò li te genyen pou fouye sa li deklare pwouve "peyi a ap viv yon moman sonb".

FBI ak Depatman Jistis la pa konfime ke yo te fouye kay la.

Devlopman sa a make yon etap dramatik nan ankèt la jistis ap mennen sou Trump e li vini nan moman kote gen yon lòt ankèt separe kap entansifye sou jefò misye te lanse pou ranvèse rezilta eleksyon prezidansyèl 2020 an.