Mezi Sekirite
Malgre pa gen okenn menas presi ni kredib pa rapo ak diskou a, lapolis pap pan okenn chans e yo re-drese kloti alantou Capitol la (syèj Palaman Etazini).
Machin lapolis ki gen limyè yo limen estasyone nan prensipal entèseksyon yo ak sou otowout yo, epi Gad Nasyonal la pare pou pase a l'aksyon si sa nesesè.
Pèson pata renmen wè sak te pase jounen 6 Janvye 2021 an repete. Jou sa a yon foul moun te atake bilding Kongrè a epi egzije pwosesis sètifikasyon viktwa Biden te ranpote nan eleksyon prezidansyèl 2020 an kanpe.
Prekosyon COVID-19
Moun kap asiste diskou sou Eta Inyon an ap gen chwa pou yo mete mask ou pa. Se gras ak konsèy Sant Prevansyon ak Kontwol Maladi a fèk chanje semèn pase a, apre yon gwo bès nan ka kowonaviris, ospitalizasyon ak lanmo apre ravaj varyan omicron an te fè nan peyi a.
Biden pap mete mask, pot pawol Lamezonblanch la, Jen Psaki fè konnen jodia. Kouvèti figi te obligatwa dènye fwa li te pwononse yon diskou devan Kongrè a.
Tout manm Kongrè a resevwa envitasyon pou yo asiste diskou a. Ane pase a yo te limite kantite moun ki te ka prezan, epi entèdi envite pou pèmèt yo respekte restriksyon COVID-19 yo. Ane sa a pap gen envite non plis.
Tès COVID-19 ak mezi distans sosyal obligatwa pou moun kap asiste diskou a.
Omwens yon demi douzèn palmantè, pami yo Depite Jamie Raskin (Maryland) Pete Aguilar (Kalifoni) ak tou le 2 manm komite kap mennen ankèt sou atak 6 Janvye a, epi Senatè Alex Padilla (Kalifoni) pap reponn prezan apre yo te teste pozitif pou COVID-19.
Senatè Republiken Marco Rubio (Florid) di li pito vag sou diskou a olye li patisipe nan sa li rele "teyat" COVID la.
"Mwen pap pran okenn lot tès COVID amwens ke mwen malad," Senatè a deklare.
Suiv nou an direk sou Facebook - https://www.facebook.com/VOA.KREYOL/videos/381854790607489/
Ann Ayiti ou ka suiv ou sou Storm TV ak sou stasyon radyo ki afilye nou yo.
