Dapre Associated Press, Palacios te gen yon mayo gri sou li e li te menote pandan aparans li devan jij la. Misye pa plede anyen fas ak 2 chèf akizasyon kap peze sou do li e li mande jij la pou yo ba li yon avoka.
Misye te reponn plizyè kesyon ki gen rapò ak salè anyèl li, pwopriyete li genyen elatriye. Misye di li gen yon kay nan vil Cali nan peyi Kolonbi e ke pensyon li kom ansyen manm lame a se $370 dola. Jij la te akòde demand li an, akoz li detèmine lajan Palacios limite.
Avoka tribinal la nomen an, Alfredo Izaguirre di Jij alicia Otazo-Reyes ke li rekomande pou Palacios rete fèmen nan prizon paske li pa gen okenn stati imigrasyon, e li pa gen okenn paran ni lot koneksyon ak moun Ozetazuni. Jij la pase lòd pou arete misye e li site kòm rezon ke Palacios ka eseye chape poul li.
Misye va gen pou'l re-parèt devan tribinal 31 Janvye. Izaguirre di kliyan ni pral pwobableman plede non koupab nan odyans sila a.
Nap raple ke la jistis Panama te arete Palacios pandan li te fè eskal nan peyi a sou wout pou'l tounen nan peyi li Kolonbi. Jamayik te lage misye epi depote'l apre avoka li te mande pou sa fèt e paske dapre la jistis Jamayiken, dokiman Ayiti te voye ba li pou mande yo voye misye Ayiti pito pat adekwa pou yo fè sa.
Nan yon nòt de près li voye bay VOA, Depatman Jistis Etazini konfime arestasyon Palacios Panama e li di ke misye te bay konsantman'l pou vwayaje Ozetazuni. Depatman Sekirite Nasyonal ak FBI akize Palacios dèske kom kwa li te konplote pou bay sipò materyèl ki te debouche sou lanmò yon lidè etranje e ke li te konplote pou'l touye yon lidè etranje.
Si yon tribinal jwenn ni koupab, Palacios ta ka pase rès vi li nan prizon.
Plent ofisyèl la jistis devwale Madi fè konnen Palacios te pale volontèman ak otorite Ameriken nan mwad Oktob la e ke yo te di'l ke yon konpayi te anplwaye'l pou'l vwayaje Ayiti kòm gad sekirite epi patisipe nan yon swadizan operasyon pou arete prezidan an. Palacios di apre sa ko-konspiratè yo te di'l vè 6 Juiyè ke plan an sete pou asasinen Prezidan Moise.
Interpol gen plizye alèt wouj kont Palacios.
Ayiti deja arete 44 sispek an koneksyon ak asasina a. Gen youn ki mouri ak COVID-19 pandan li te nan prizon e gen 4 lot jij te lage. Poko gen okenn akizasyon ofisyel ki lanse kont moun sa yo.
Korespondan VOA sou zafè jistis Masood Farivar kontribye a repotaj sa a, yon pati nan enfomasyon yo soti nan Associated Press.
