Otorite Panama arete Lendi yon ansyen manm lame Kolonbyèn nan ke otorite Ayisyen yo ap chache an koneksyon ak asasina Prezidan Jovenel Moise ane pase a, dapre sa 2 sous di ajans nouvèl Reuters.
Yo arete sispèk la, Mario Antonio Palacios, 43 zan, pandan yon eskal li te fè nan peyi a, apre Jamayik te depote li nan Kolonbi.
Otorite Ayiti akize Palacios dèske li te fè pati yon gwoup mèsenè ki te asasinen Moise nan mwad Jiyè 2021 lakay li. Madan Moise te blese nan atak la.
Yon sous imigrasyon Kolonbyèn di Reuters yo arete Panama pandan yon eskal avyon li te fè nan panama e yo mande'l pou'l "volontèman" monte nan yon avyon pou'l al Ozetazuni.
Si li te rezite, otorite Panama yo te di yo tapral aplike alèt wouj Interpol lanse kont misye, ke Etazini te pibliye met sou yon alèt wouj ki te deja egziste kont li, dapre sous la.
Ayiti lanse yon alèt wouj Interpol kont Palacios tou.
Li poko klè si Palacios al Ozetazuni vreman vre.
Otorite Panama yo pa fè okenn komantè piblik sou koze a, men yon moun ki byen ranseye sou kestyon an nan Panama konfime ke yo arete Palacios.
Yon videyo sous la, ki refize pou yo nomen non'l, pataje ak Reuters montre 2 ajan imigrasyon ap eskote yon nèg ke ou paka wè figi li pandan yap mache nan sak sanble ayewopo Panama.
Rezo televizyon Kolonbyen Noticias RNC rapote detansyon an tou.
Avoka Palacios pat vle fè okenn komantè pou kounyea. Interpol pat reponn kestyon Reuters poze sou kestyon an non plis.
