Gad Kòt Etazini anonse li sove sa pa gen lontan, 27 migran Ayisyen sou yon ti zile kote okenn moun pap viv ki gen morn ak wòch e ki sitye ant Pòtoriko ak Repiblik Dominikèn.
Operasyon sekou a dire 2 jou e li tanmen 7 Jyen apre Gad Kòt te di li te detekte yon bato kontrebann tou pre zile Pòtoriken ki rele Monito a. Otorite yo di yo arete 3 kontrebandye e yo sove 9 sou 27 Ayisyen ki te lage kò yo nan lanmè lè yo te wè Gad Kòt la.
Ajans la di kondisyon danjre te anpeche yo sove rès Ayisyen yo, e ke yo te kite manje, dlo ak lot pwovizyon pou yo jiskaske yo te ka tounen yon jou apre pou sove rès 18 Ayisyen yo.
Operasyon sekou a dewoule prèske yon semen anvan fineray 11 fanm Ayisyen ki te mouri lè yon bato ki te chaje ak migran te chavire tou pre teritwa Etazini mwa pase a. Otorite yo kwè ant 60 ak 75 migran te abò bato sa a. Yo rive sove 38, men 11 mouri.
Gad Kòt di li bloke 64 vwayaj ilegal ant 1 Oktòb ak 31 Me a e ke gen plis pase 1,200 migran ki soti Repiblik Dominikèn ak 370 Ayisyen ke li arete.
Ajans la di kantite Ayisyen li te arete pandan ane ki pase a ogmante anpil, konpare ak ane anvan yo.
Ayiti ap fe fas ak anpil ensekirite akoz zak vyolans gang yo epi kidnapping ak asasina. Se sa ki lakoz anpil moun kouri kite peyi a pou chache yon lavi miyò.
