Depite Lavalas Printemps Belizaire pat kapab reponn envitasyon jij Jean Wilner Morin pou l te vinn reponn kesyon kòm temwen nan dosye disparisyon jounalis-fotograf Vladimir Legagneur.
Depite a, ki anba yon seri lòt akizasyon, di jij la rezon absans li a se akoz li trouve l an vwayaj ofisyèl o Kanada. Men l ap disponib apre vwayaj la.
Jounalis Legagneur te disparè depi nan dat 14 mas 2018. Otorite lapolis yo minimize chans pou yo te retwouve li an vi. Pòtpawol enstitisyon polis la alepòk, Frantz Lerebour, te di Lavwadalmerik chans pou jwen jounalis fotograf la an vi minim anpil pliske pa gen okenn demand pou ranson ki te fèt si pou ta konsidere ka a tankou yon ka danlèvman.
Gouvènman ayisyen atravè minis kominkasyon an te ekprime solidarite li ak fanmi jounalis la kote li te fè konnen otorite polisyè ap kontinye debouye yo kou mèt jan jak pou rive fè limyè sou disparisyon Mesye Legagneur .
Yon lòt kote, òganizasyon jounalis ayisyen tankou Association des medias Haitians (ANMH), Association des Journalistes Haitiens( AJH) pou n site sa yo sèlman te eksprime enkyetid yo devan disparisyon jounalis fotograf la.
