2 depite, Jean Marcel Lumérant, reprezantan sikonskripsyon Gran Goave nan Chanm Bas la, ak Tanis Tertius, reprezantan Limonade, bay opinyon yo sou fenomèn grangou k ap frape plizyè rejyon nan peyi a. Minis afè etranjè gouvènman demisyonè a, Bocchit Edmond, bay detay sou dispozisyon otorite yo.
Ayiti toujou ap fè fas ak ensekirite alimantè. Konsa li toujou bezwen prezans yon seri ONG kap ede moun ki pi pòv yo siviv. Reciprocal Ministries International se youn nan ONG ki sou teren an. Daniel Shoemaker, prezidan RMI ki baze nan Fort Myers nan eta Florid te pale sak Serge F. Michel.
Depatman Nòdès pa epanye anba kriz grangou peyi Dayiti ap travèse a. Sepandan, gras ak sipò kèk òganizasyon non-gouvènmantal plizyè timoun rive resevwa pen lenstriksyon vant plen. Responsab sant rejyonal "Food for the Poor" Monseyè Elius Bélizaire fè konnen yo rive touche anpil moun nan kad distribisyon manje yo fè nan Nòdès e yap kontinye ede sila yo ki pi vilnerab yo. Detay ak Jaudelet Junior St. Vil.
Kriz manje peyi Dayiti ap travèse a, gen gwo konsekans sou manman kap redi pou kont yo pou elve pitit, ak moun ki gen pwofesyon manyèl e ki deja gen difikilte pou bay fanmi yo manje chak jou. Matiado Vilme pale ak manm kèk fanmi ann Ayiti ki rakonte l sitiyasyon yo.
