Kowòdinasyon Nasyonal Sekirite Alimantè, Plan Repons Imanitè, OCHA (Ofis Nasyon Zini pou Kowodinasyon Afè Imanitè), elatriye fè konnen yon afè de 2 milyon 600 mil ayisyen, swa anviwon yon 1/4 popilasyon an, pa jwenn manje oubyen pral gen difikilte pou yo jwenn manje pandan rès ane 2019 la.
Ekonomis Camille Chalmers kwè pwoblem grangou popilasyon ayisyen lan ap konnen jounen jodi a se rezilta move desizyon gouvenman an ap pran. Toutfwa ekonomis la panse, si otorite yo pran mezi apwopriye, sitiyasyon an ka chanje. Konsa, Camille Chalmers fè kek pwopozisyon bay chèf leta peyi a.
Kriz manje peyi Dayiti ap travèse a, gen gwo konsekans sou manman kap redi pou kont yo pou elve pitit, ak moun ki gen pwofesyon manyèl e ki deja gen difikilte pou bay fanmi yo manje chak jou. Matiado Vilme pale ak manm kèk fanmi ann Ayiti ki rakonte l sitiyasyon yo.
Depatman Nòdès pa epanye anba kriz grangou peyi Dayiti ap travèse a. Sepandan, gras ak sipò kèk òganizasyon non-gouvènmantal plizyè timoun rive resevwa pen lenstriksyon vant plen. Responsab sant rejyonal "Food for the Poor" Monseyè Elius Bélizaire fè konnen yo rive touche anpil moun nan kad distribisyon manje yo fè nan Nòdès e yap kontinye ede sila yo ki pi vilnerab yo. Detay ak Jaudelet Junior St. Vil.
