Adidas poko detèmine kisa li pral fè ak $1,3 milya soulye tenis deliks Yeezy li genyen apre li mete fen nan kontra li te siyen ak rapè Kanye West.
Soulye yo chita nan depo depi 7 mwa kounyea. Adidas, ki se yon konpayi Alman, te mete fen nan kontra li ak Kanye akoz komantè li te fè sou Juif ak lòt kòmantè ofansiv li te fè sou rezo sosyal yo.
PDG Bjorn Gulden deklare Vandredi Adidas "ap pwoche yon desizyon".
Misye derefize di si Adidas ekate posibilite pou l ta detwi soulye yo, men li di konpayi an ap eseye "evite fè sa".
Adidas rapòte ke fen kontra Kanye West la lakoz yo pèdi $441 milyon nan lavant soulye depi kòmansman ane a.
