Bandi « Viv Ansanm » yo atake komin Kenskòf yon lòt fwa ankò, madi 4 mas 2025 lan.
Manm gwoup kriminèl yo te rive presizeman Badyo, yon lokalite komin nan. Enfòmasyon yo revele, aprè atak sila a, asayan yo te pran direksyon wout « Kay Jacques » la ki mennen nan depatman Sidès peyi a. Daprè majistra Kenskòf la, Massillon Jean, bandi yo kidnape plizyè moun.
Kòm estrateji bandi yo te fouye gwo twou sou wout la pou anpeche machin lapolis yo rive sou yo. Majistra konfime sa gen plizyè semèn depi lapolis ak fòs miltinasyonal la enstale l Kenskòf.
Bandi yo te mennen premye atak yo Kenskòf, 27 janvye 2025. Daprè Rezo nasyonal k ap defann dwa moun yo (RNDDH), 134 moun pèdi lavi yo depi lè atak yo kòmanse a. Biwo Pwoteksyon Sivil rive anrejistre 18 mil moun ki fòse kite lakay yo.
