Nan yon kominike Òganizasyon an te pibliye jedi 16 janvye a yo plede pou pwoteksyon pou timoun yo ki ap fè fas ak tout kalite danje tankou eksplwatasyon ak asèlman seksyèl.
Nan yon deklarasyon direktè Plan International la Prospery Raymond di "Kominote entènasyonal la paka fèmen je l sou kriz la. Li lè li tan pou bay priyorite ak sa k ap pase an Ayiti a epi garanti timoun ki deplase yo jwenn pwoteksyon, ledikasyon ak èd imanitè."
Pou Raymond, kantite timoun ki nan kouri yo pa sispann ogmante. Timoun yo ekpoze ak tout kalite danje.
Nan sa ki gen pou wè ak asèlman ak abi seksyèl, Tifi yo pi vilnerab, selon Plan International ki fè konnen, ensekirite a, melanje ak mankman ki genyen pou jwenn sèvis nòmal, plis kantite moun k ap kouri yo... tout sa yo kreye yon kriz konplèks ki dwe jwenn solisyon prese prese.
Òganizasyion an souliye "Kriz la gen yon enpak terib sou fanm ak tifi nan kominote ki afekte yo"
N ap fè sonje, pou ane 2024 la, Medsen San Fwontyè akonpaye plis pase 4400 fanm ki sibi kadejak.
Anpil nan zak sa yo fèt sou fanm k ap viv nan kan deplase.
