Pandan yon odisyon nan Chanm Depite Etazini Mekredi maten, manm komisyon kap travay sou Sibèsekirite, Teknoloji Enfomatik ak Inovasyon Gouvènman an mande plis transparans sou Fenomen Anormal Non-Idantifye -ke pi fò moun konnen kòm OVNI.
Panèl ekspè ki te reponn kestyon depite Ameriken yo avwe ke Pantagon nan gen yon baz done ki gen plizyè milye prèv ki montre fenomen sa yo egziste vreman vre.
Luis Elizondo se yon ansyen responsab Depatman Defans Etazini:
"Mwen kwè Ameriken merite tande verite a e mwen kwè mond lan ka aksepte verite sa a."
Manm panèl la ki enkli ansyen responsab Fòs Naval la, La NASA ak Depatman Defans Etazini, di yo espere nouvo administrasyon an va pase lòd pou bay piblik la aksè ak pakèt done Pantagonn nan genyen ki pwouve fenomen sa yo egziste e ke yo ka poze yon risk pou sekirite peyi a.
Michael Shellenberger se fondatè oganizasyon ki rele Public.
"Sa pèp Ameriken an dwe konnen se ke kominote militè ak ransèyman Ameriken yo chita sou yon dig dal done - foto ak lòt enfòmasyon, videyo, prèv - depi lontan e yo klè pa tankou sa ke nou konn wè yo pibliye."
Shellenberger di gen plizyè santèn si se pa milye imaj nan rezo done sa a.
Amiral retrete Fòs Naval Etazini Tim Gallaudet di li te we yon OVNI pou premye fwa an 2015 pandan yon egzèsis militè fòs naval la tap fè. Pandan ane ki pase yo, misye di li we prèv ki montre gen teknoloji deyo a ki depase kapasite kretyen vivan genyen.
"Map spekile depite, ke yo pa vle pibliye enfòmasyon sa a paske yo pa vle revele feblès nan kapasite pou n pwoteje espas ayeryen nou."
Elizondo te detaye kapasite OVNI yo genyen konpare ak pi bon teknoloji Etazini. konstate pandan rechèch li.
"Kò imen an ka reziste fos puisans 9g anvan li sibi konsekans biyolojik -pèdi konesans - senyen - mouri - konparativman meyè teknoloji nou F16 la youn nan avyon militè ki gen plis kapasite ka pèfome ak fòs puisans 17 ou 18g anvan li konstate echèk striktirèl setadi avyon an kòmanse kraze an miyèt mòsso - aparèy ke nap pale yo pèfòme ak yon fòs puisans plis pase, 1,000, 2,000, 3,000g."
Pi fò done responsab yo mansyone kadnase e se moun ki gen pèmisyon pou wè dokiman tòp sekrè sèlman ki gen aksè ak yo.
Responsab ki temwaye devan palman an eksprime kè sote yo akoz mank transparans ki egziste a, ki debouche sou abi pouvwa. Yo mande pou Kongrè a egzije ajans gouvènman ki gen aksè ak done sa yo travay ak plis transparans, epi mete Kongrè a o kouran regilyèman de sa yo jwenn.
Yo mande tou pou kreye yon platfòm kote moun ki wè OVNI yo ak sa yo ki anrejistre videyo oubyen fè foto yo, epi sa yo ki gen aksè ak rezo sekrè done yo ki fè fas oubyen temwaye abi, ka di sa yo konnen san repèkisyon.
Facebook Forum