Beyonce fè listwa ankò. Dènye albòm li an, "Act II: Cowboy Carter" rive nan nimewo 1 sou lis albòm mizik country ki pi popilè Ozetazini dapre magazin Billboard.
Li se premye fanm nwa ki janm nan tèt lis la depi yo te komanse pibliye lis la an 1964. Albom nan sitye an premyè plas tou sou lis Billboard 200 la. Kidonk sa fè 8èm albòm mamzèl pibliye ki rive nan nimewo 1.
Dapre Luminate, albom "Cowboy Carter" la te vann ekivalan 407,000 kopi depi li soti Ozetazini 29 Mas.
Antanke fanm nwa kap reklame mizik country, Beyonce kanpe an fas anpil stereyotip dèske se blan sèlman ki chante kalite mizik sa a.
Nan mwad Fevriye a, tub li a, "Texas Hold 'Em" te rive nan nimewo 1 sou lis chante country stasyon radyo yo jwe pi plis pase tout lòt yo.
