Ansyen Senatè Ayisyen Joseph John Joel plede koupab Madi 10 Oktòb la devan yon tribinal Ameriken a 3 chèf akizasyon ki gen rapò ak asasina Prezidan Ayisyen Jovenel Moise.
Misye se twazyèm pami 11 akize ki plede koupab. Jij la pral pwononse santans li 19 Desanm.
Nan yon deklarasyon li fè, John plede koupab a akizasyon ki di li te founi sipò materyèl nan konplo asasina Moise la. Ladann gen lwe machin epi entwodui patisipan yo a gang ke yo te bezwen pou apiye yo epitou achte zam.
Ansyen chèf polis nasyonal Ayiti, Leon Charles te pale sou wòl ex-senatè a nan konplo a.
"Ansyen senatè Joseph Joel John te jwe yon wol trèz enpòtan. Li se moun ki te founi zam yo, li te planifye rankont yo, li te tabli kontak ak otè entelektyèl yo. Li te patisipe nan asasina prezidan an. Lapolis ap chache l. Nou mande popilasyon an rele lapolis si yo wè moun sa yo. "
Dapre deklarasyon an, Joseph te prezan nan rankont kote yo te diskite sou asasina Moise la, epitou nan rankont yo te fè nuit asasina a.
