Yon Jij federal nan Miami kondane biznisman Ayisyen-Chilyen Rodolphe Jaar pou l pase rès vi li nan prizon pou wòl li jwe nan ede yon gwoup mèsenè Kolonbyen yo jwenn zam pou asasinen Prezidan Ayisyen an Jovenel Moise 7 jiyè 2021.
Rodolphe Jaar ki gen nasyonalite Ayisyèn ak Chilyèn, te plede koupab nan mwad Mas pase a, a akizasyon kom kwa li te konplote pou komèt yon asasina oubyen kidnapping andeyo peyi Etazini epi bay sipo materyèl ki te lakoz lanmo yon moun.
Jij Federal Jose E. Martinez pwononse santans la pandan yon odisyon ki te dewoule nan yon tribinal federal anbalavil Miami. Jaar resevwa santans maksimom nan, malgre li te plede koupab epi pwomèt pou l kowopere ak anketè yo ak espwa dèske yo tapral fè pa li epi ba li yon santans ki pi leje.
Biznisman nan, ki te travay kom enfoman pou gouvènman Ameriken an te jwenn yon kondanasyon sa gen 10 zan des pou trafik dwog. Li se youn pami 11 moun lajistis Ameriken arete epi akize an koneksyon ak asasina Moise la. Li se sèl akize ki plede koupab. 10 lot yo sipoze konparèt devan tribinal nan mwad Jiyè a, men li posib pou yo ranvwaye dat la.
Prezidan Moise te mouri asasinen nan mwad Jiyè 2021, apre nèg ak zam te debake nan rezidans prive li nan yon banlye Potoprens epi tire e touye li. Li te gen 53 zan.
Met sou Jaar, lot akize ki fèmen nan prizon Miami se: ex solda Kolonbyen Mario Palacios, ak German Alejandro Rivera Garcia; ansyen senatè Ayisyen John Joel Joseph; Ayisyen Ameriken James Solages, Joseph Vincent ak Christian Emmanuel Sanon; Ameriken Frederick Joseph Bergmann;Kolonbyen Arcangel Pretel Ortiz; Venezyelyen-Ameriken Antonio Intriago, epi finansye Ekwatoryen-Ameriken Walter Veintemilla.
Gouvènman Ayisyen an arete plis pase 40 moun pou swadizan wol yo te jwe nan asasina a - pami yo 18 ex-solda Kolonbyen.
Jaar te rive nan Sid Florid nan mwad Janvye 2022, apre yo te arete l nan Repiblik Dominikèn. Li fèmen nan prizon Ozetazini depi lè a. Dapre otorite Ameriken yo, li te volontye pou yo transfere l Miami pou fè fas ak akizatè li yo.
Dapre dokiman legal yo, konplotè yo te gen entansyon kidnape prezidan Ayisyen an nan komansman, men pi ta plan an te chanje epi yo te deside touye l pito. Konplotè yo te espere jwenn kontra ak nouvo administrasyon Ayisyen an apre ke Moise pat sou pouvwa a anko, dapre anketè yo.
Jaar te responsab pou apwovizyonman zam pou mèsenè Kolonbyen yo, dapre dokiman legal tribinal la posede. Plizyè pami solda Sid Ameriken yo te rete nan yon kay ke Jaar te kontwole, dapre sak nan akizasyon lajistis la.
