Otorite nan Ikrèn di jodi jedi a fòs ris yo lanse yon pakèt atak sou divès vil pandan lannwit la, kote yo touye 2 moun pou pi piti.
Lame Ikrèn nan dekri aksyon ris-la kòm yon « kokenn atak sou enfrastrikti sivil nan plizyè rejyon. »
Oleksandr Prokudin, ki se gouvènè rejyon Kherson nan, di yon frap ris touche yon bilding rezidansyèl, kote li touye 2 moun e blese 5 lòt.
Sergiy Popko, ki se chef administrasyon militè nan Kyèv, di sou Telegram ke debri tonbe sou kapital Ikrèn nan apre defans anti-aeryen te desann misil ris yo.
Majistra Kyèv, Vitali Klitschko, di jedi 7 moun blese e dega fèt nan pliyè bilding.
LaRisi di li detwi 19 dronn Ikrèn sou Penensil Krime ke li te anekse a epi sou lanmè Nwa a ak lòt sou rejyon Kursk, Belgorod ak Orlev nan LaRisi.
Prezidan Ikrèn Volodymyr Zelenskyy gen pou-l rankontre ak lidè Etazini-yo jedi nan Washington pandan li ap chache plis sipò pou peyi li konbat envazyon LaRisi a.
