Kenya anonse Samdi li pare pou dirije yon fos miltinasyonal an Ayiti, epi deplwaye 1,000 polisye nan peyi a, pou ede l jere ensekirite a. Li di li pare pou fè sa tou suit apre yo aksepte of li fè a.
"Kenya aksepte anvizaje pozitivman lide pou li pran tèt yon fos miltinasyonal an Ayiti. Kenya pran angajman pou deplwaye yon kontenjan 1,000 polisye pou ede Ayiti fome polis ayisyèn nan epi ede l retabli nomalite nan peyi a ak pwoteje enstalasyon estratejik yo," minisè afè etranjè a deklare nan yon kominike li pibliye.
Pwopozisyon deplwaman an, bezwen apwobasyon Konsèy Sekirite Nasyonzini an ak konsanman otorite lokal yo, ministè a presize.
"Yon misyon evalyasyo pa yon ekip operasyonal lapolis Kenya previ pou semèn kap vini yo," kominike a di. Li ajoute sa pral pèmèt yo genyen enfomasyon sou manda fos la an fonksyon de bezwen operasyonal misyon yo pral pousuiv an Ayiti.
Okenn lot detay pa disponib pou kounyea.
Sekretè Jeneral Nasyonzuni, Antoni Guterres ak Premye Minis Ayisyen, Ariel Henry lanse apèl bay kominote entènasyonal la pou l entèveni pou ede polis lokal la ki pa an mezi pou yo tabli sekirite nan moman gang yo kontwole prèske 80% kapital la, Potoprens.
Zak kriminèl gang yo ap miltipliye - tankou pa egzanp kidnaping, vol ak zam epi vol otomobil.
Samdi tou, Sekretè Deta Ameriken Antony Blinken te afime ke gen pwogrè ki fèt pou kreye yon fos miltinasyonal pou retabli lapè an Ayiti.
Kenya deja deplwaye fos mentyen lapè li nan peyi etranje - a savwa Repiblik Demokratik Kongo epi Somali.
Facebook Forum