Depatman Deta mande tout anplwaye non-esansyèl Anbasad Amerikèn Pòtoprens la ak fanmi yo pou yo pati kite Ayiti.
Nan yon nòt pou laprès li pibliye Vandredi 28 Jiyè, Depatman Deta di avètisman li rete nan nivo 4, kivledi Pa Vwayaje pou peyi d Ayiti.
Nouvo avètisman sa a ranplase konsèy ki te pibliye 17 Me, 2023 a.
Depatman Deta site kòm rezon pou desizyon li an, kidnaping, krim, manifestasyon ak move swen sante ak enfrastrikti pou lasante.
"Sitwayen Ameriken an Ayiti ta dwe pati kite Ayiti osito posib, swa nan avyon komèsyal, swa pa mwayen transpò prive ki disponib pou yo, akoz ensekirite a ak defi ki poze pou enfrastrikti peyi a. Sitwayen Ameriken ki vle pati kite Pòtoprens, ta dwe koute nouvèl lokal yo, epi fè sa sèlman lè yo ka vwayaje an sekirite," nòt de près la di.
Nouvèl sa a tonbe yon jou sèlman apre odisyon diplomat Prezidan Joe Biden chwazi kom nouvo anbasadè Etazini nan Pòtoprens, Dennis Hankins.
Hankins te reponn kestyon senatè Ameriken yo Mèkredi sou sityasyon Ayiti ak jefò kap fèt pou voye yon fòs entènasyonal an Ayiti pou jere ensekirite a.
Depatman Deta esplike nan nòt pou laprès li a ke gouvènman Ameriken an trè limite nan kapasite li pou l dispoze swen dijans pou sitwayen Ameriken kap viv an Ayiti. Li ajoute polis Ayisyèn nan pa gen resous pou reponn yon fason efikas ak krim. Met sou sa gen rate gaz, elektrisite ak medikaman.
Dapre Depatman Deta, anplwaye gouvènman Ameriken kap travay Ayiti limite a zòn ozalantou anbasad la e yo entèdi yo mache nan lari Pòtoprens, vwayaje nan transpò piblik, ale labank, kondui nan nuit, vwayaje okenn kote ant 1hè ak 5hè di maten, epi vwayaje san apwobasyon davans ak mezi sekirite espesyal.
