Pandan yon vizit nan Guyana, Sekretè d Eta Antony Blinken deklare Jedi Etazini kontinye ap konsantre jefo li sou eleksyon lib, onèt ak kredib nan Venezyela ane pwochèn.
" Gen plizyè etap rejim Caracas la ka franchi pou montre li vle oganize eleksyon lib. Sa ou sot mansyone a ki se diskalifikasyon yon lidè opozisyon pou l patisipe nan eleksyon sa yo voye yon mesaj kontrè. Se vreman malere. Nou detèmine pou n kontinye kowoperasyon entènasyonal ak kowodinasyon pou mete presyon sou rejim nan pou l pran angajman pou oganize eleksyon lib e onèt an 2024."Blinken te pale pandan yon konferans pou laprès ak Prezidan Guyana Ifraan Ali.
Lè yo mande l si sanksyon Etazini pran kont Venezyela pral rete, Blinken di - se yon fason pou atenn objektif nou epi repon dezi pèp Venezyelyen an genyen pou retabli demokrasi nan peyi a.
Blinken te pale tou sou Ayiti.
"Nou pase tan, nou dispoze resous pou kore polis nasyonal Ayisyèn nan men dapre analiz nou malgre tout sa nesesè li pa ase. Jan ou tande lidè Ayisyen yo di l, jan ou tande pèp Ayisyen an di l, jan ou tande Sekretè Jeneral Nasyonzuni ak manm l'OEA yo di l gen yon konsansis pou ta gen yon fos miltinasyonal ale nan peyi a pou apiye fos polis la epi eseye kreye yon espas pou sekirite tabli. Sa ta pèmèt nou pouse pou pi devan ak travay nap fè ak lapolis ak sèvis sekirite Ayisyen yo pou ba yo tan pou gouvènman an reprann kontwol pati peyi a ke gang yo ap kontwole kounyea. Nou te gen konvèsasyon trèz aktiv ak peyi nan rejyon an ki ale pi lwen pase yon fos entènasyonal."
Anvan vizit li nan Guyana, Blinken te pase Trinidad ak Tobago, kote li te rankontre lidè CARICOM yo epi asiste selebrasyon 50èm anivèsè oganizasyon an.
Enfomasyon pou repotaj sa a soti nan Associated Press
