Yo te pale de yon pakèt kesyon, antwòt bezwen ijan pou ogmante limit dèt ke nasyon an ka fè, ki se kantite lajan ke Kongrè a otorize gouvènman an prete pou fè fas ak obligasyon depans li.
Biden te eksplike McCarthy klè ke “se devwa yo tou le 2 pou yo pa kite peyi a tonbe nan yon katastwòf ekonomik, bagay ki pako janm rive deja,” dapre yon kominike ke Mezon Blanch pibliye apre rankont la.
Etazini rive nan plafon 31 trilyon 400 milya dola dèt 19 Janvye pase. San yon akò, peyi a p ap ka peye dèt li pou premye fwa nan kèk mwa konsa, petèt plonje nan yon kriz ekonomik.
Moun pa te espere pou anyen serye soti nan rankont Biden-McCarthy a. Kèk obsèvatè te fè wè ke paske sete premye rankont ant 2 lidè yo, okenn nan yo pa te vle parèt fèb si yo ta jwenn yon konpwomi twò vit.
