Polisye Ayisyen yo bloke lari Jedi epi fòse antre nan prensipal ayewopò kapital la pou pwoteste kont asasina kanmarad yo ke gang touye.
Manifestan yo te abiye an sivil e yo idantifye tèt yo kòm polisye. Yo te atake pou kòmanse, rezidans ofisyèl Premye Minis Ariel Henry a dapre yon temwen ki pale ak ajans nouvèl Reuters, epi apre sa yo te anvayi ayewopò a nan moman Henry tap rive an Ayiti apre yon vwayaj an Ajantin.
Yon sous ki mande Reuters pou yo pa idantifye li di: "PM la toujou nan ayewopò a li paka kite pou kounyea."
Polis Nasyonal Ayiti ak Primature la pat reponn demann Reuters te fè pou komantè.
Yon videyo yon medya lokal kapte montre yon gwoup nèg ak zam, kèk pami yo te gen chemiz ki gen "Police" eri sou yo, ki tap joure yon gwoup polisye an inifòm nan ayewopò a epi apre sa yo depase ofisye yo san okenn goumen.
Manifestan bloke wout ozalantou Pòtoprens ak plizye lot vil nan peyi a.
Semèn pase a, 4 polisye te mouri anba bal gang Vitelhomme lan. Mèkredi gang Savien an te touye yon lot gwoup 7 polisye nan vil Liancourt.
Nasyonzini ap diskite sou posibilite pou yo ta voye yon fòs entèvansyon etranje an Ayiti pou konfwonte gang kriminèl yo. Ayiti te fè demann nan sa gen 3 mwa desa men oken peyi pa ofri pou l dirije fòs sa a.
