Etazini deklare Madi li pral pwopoze non kèk lòt Ayisyen ke sanksyon Nasyonzini ta dwe sible. Se yon mezi Lachin apiye ak tout fòs li nan moman peyi d Ayiti ap konbat yon epidemi kolera, gwo rate manje epi zak vyolans gang yo.
Konsèy Sekirite Nasyonzini an, ki gen 15 peyi manm te mete l dakò nan mwad Oktòb la pou bloke byen, enpoze entèdiksyon vwayaj epitou yon anbago zam kont nempòt ki moun ki menase lapè ak stabilite Ayiti. Premye sanksyon li te anonse a te sible youn nan chèf gang pi puisan yo.
Sekretè-Jeneral LONU, Antonio Guterres pwopoze yon "fòs entèvansyon rapid" ki ta vwayaje an Ayiti pou ede lapolis konbat gang yo. Gouvènman Ayiti mande LONU sa tou.
Helen La Lime, Direktris Biwo Entegre Nasyonzini pou Ayiti, BINUH deklare: "Plan sa a poko materyalize."
Li ajoute: "Majorite Ayisyen vle asistans sa a pou yo ka viv nan lapè. Zak vyolans gang yo rive nan nivo nou pa konstate depi plizye dizèn lane. Asasina ak kidnaping ogmante pou yon 4èm ane youn apre lòt."
Anbasadè adjwen Etazini nan Nasyonzini, Robert Wood, deklare Washington ankouraje ke sanksyon LONU yo "dekouraje" moun ki tap chache finanse zak vyolans kap koze enstabilite a an Ayiti."
Woods di: "Lezetazini ap idantifye kèk lòt moun ki mele nan ensekirite a pou l nomen nan yon nouvo seri sanksyon Nasyonzini. Fòk Etazini ta prezante yon plan konsa pou komanse devan komite sanksyon Ayiti a, ki va pran yon desizyon pa konsansis.
Anbasadè Chinwa a, Zhang Jun mande pou yo revize sanksyon Ayiti yo san pèdi tan epi modifye yo. Li mande tou pou yo aplike mezi yo konplètman "pou kreye anbyans nesesè pou dekouraje gang yo komèt zak vyolans."
Anbasadè adjwen Larisi, Dmitry Polyanskiy limenm deklare komite sanksyon Ayiti a ta dwe entansifye travay li pou jwen "vre sous finansman gang yo an Ayiti ak chimen zam ilegal kap rive sou zile a ap pran."
