Yon tribinal nan La Tiki rejte Lendi, yon demann pou ekstrade Samir Handal, youn nan sispèk nan asasina Prezidan Jovenel Moise, Anayiti.
Prezidan Moise mouri asasinen 7 Jiyè 2021 nan rezidans prive li. Madanm ni te blese nan atak la. Yon gwoup mèsenè Kolonbyen te prensipal sispèk yo nan komansman, malgre okenn nan yo poko parèt devan tribinal an koneksyon ak ka sa a.
Biznisman Samir Handal, ki gen nasyonalite jòdanyen te jwenn arestasyon ni lè li te fè eskal nan La Tiki akoz Interpol te gen yon alèt wouj kont li. Handal te pran avyon depi Etazini nan mwad Novanm ane pase a pou'l al Jòdani, men avoka li yo di alèt wouj la te vinn leve pita sou demann yo.
Handal ak avoka li yo di misye te sèlmwan lwe Emmanuel Sanon, ke la jistis sispèk kom moun ki te konplote asasina a, yon kay. Yo di Handal pat o kouran lòt plan yo.
Yon rapò Polis Nasyonal Ayisyen pibliye nan mwad Out deklare Handal te òganize "rankont politik" lakay li nan Potoprens, e ke pami moun ki te patisipe te gen Sanon.
Handal asiste odisyon tribinal yo pa videyo-konferans depi prizon kote li fèmen nan vil Ankara depi 8 mwa. Li te kriye epi mete men'l anlè lè jij yo te li vèdik la epi pran desizyon pou lage'l.
Handal deklare li inosan e ke alèt wouj la leve.
Avoka yo di yo pa dwe ekstrade Handal paske li ta fè fas ak travo fòse Anayiti epi yo taka toupizi li oubyen li taka mouri nan prizon akoz konsidyon sevè ki egziste nan peyi a.
Yo souliyen tou ensètitid politik ki egziste nan peyi a. Ministè Afè Etranje La Tiki te lanse avètisman semèn pase a kont vwayaj nan peyi d'Ayiti akoz pakèt krim ak kè sote pou ensekirite ki egziste yo.
"Prèv nou klè. Li pa difisil pou wè yo pap aji yon fason jis ak kliyan nou, yo pal toupiri epi touye li," avoka Mahmut Barlas deklare Lendi.
Ayiti te voye yon lèt bay otorite Tik yo pou di yo papral kondane Handal pou'l fè travo fòse.