Yon jounalis Ayisyen mouri Dimanch apre li pran yon bal nan tèt lè lapolis te louvri zam sou jounalis ki tap mande liberasyon kolèg yo ke lapolis arete pandan li tap fè repòtaj sou yon manifestasyon, dapre sa temwen di Associated Press.
Jounalis ki te prezan idantifye repotè ki mouri a kòm Romelo Vilsaint e yo di li te travay pou yon medya an liy. Vilsaint te kouche atè a nan paking stasyon komisarya Delmas a nan Pòtoprens e kolèg li te ansèkle'l epi pran kriye.
Richard Pierrin, yon fotograf ki travay pou Agence France Presse di AP li wè lapolis tire epi frape Vilsaint.
Gary Desrosier, pòt pawòl Polis Nasyonal Ayiti konfime pou AP ke Vilsaint mouri pa bal men li derefize fè okenn lòt kòmantè eksepte pou di sete yon sityasyon "lamantab".
Nan moman jounalis ak sitwayen te ansèkle komisarya a apre lanmò Vilsaint, ofisye yo te tire gaz lakrimojèn pou dispèse yo.
Jounalis ki te sou plas di moun yo arete a rele Robest Dimanch e li travay pou Radio Tele Zenith. Li tap fè repotaj sou yon manifestasyon lè yo arete'l.
Moun ede yon jounalis ki afekte pa gaz lakrimojen lapolis tire pandan yon manifestasyon kont lanmo jounalis Romelo Vilsaint nan Potoprens, Dimanch 30 Oktob 2022.
Kolektif Medya An Liy, yon asosyasyon jounalis lokal denonse arestasyon Dimanch la e yo di yo trete'l tankou yon "kriminèl danjre" e ke yo akize'l dèske li tap deranje lòd piblik la. Dimanch se yon pòt pawòl òganizasyon an tou.
"Pòt pawòl nou aji nan kad misyon jounalistik li pandan li tap kouvri yon manifestasyon," òganizasyon an fè konnen. "Detansyon an se dènye nan yon seri siy, san dout sa ki bay plis kè sote a, de yon retou atak kont libète enfomasyon. Fòk yo lage jounalis sa a."
Oganizasyon an mande tou pou moun ki responsab pou asasina jounalis Garry Tess ak atak 25 Oktòb kont jounalis Le Nouvelliste ak Magik 9 Roberson Alphonse konparèt devan lajistis.
Mèkredi, Le Nouvelliste, ki se pi gran jounal an Ayiti te anonse lap sispann piblikasyon jounal la akoz "pwoblèm ensekirite grav" ki anpeche l pwodwi ak distribye jounal la.