VOA Kreyol mande Lamezonblanch poukisa yo pat envite Ayiti patisipe nan Somè sou Demokrasi a. Men sa Juan Gonzalez, ki se Asistan Spesyal Prezidan Biden ak Direktè Wo Plase pou Zafè Emisfè Oksidantal la nan Konsèy Nasyonal Sekirite a, reponn.
" Ayiti ap fè fas ak anpil defi. Kounyela a gen yon diyalog kap fèt ant sosyete sivil la ak gouvenmen premye minis (Ariel Henry a) e nou pat vle bay lejitimite oubyen apiye okenn aktè an patikilye paske sa nou wè kap pase nan peyi a kounyea trèz itil. Se yon (pwosesis) ki trè konstriktif e diyalog sa a dwe kontinye. Mwen kwè gwoup Montana a gen anpil pwojè pozitif ak konstriktif, men yo se manm sosyete sivil la, manm sektè prive a, aktè politik, nou vle wè yo kolabore ansanm. E se sou sa administrasyon (Biden nan) ap konsantre. Non sèlman sa, men nou konsantre anpil anpil sou chache yon mwayen pou tabli yon plan de baz pou Ayiti ki fè fas ak ensekirite a, ki ede Ayisyen reprann kontwol peyi yo epi determine pwop avni pa yo."
VOA Kreyol pwofite okazyon an pou mande misye Gonzalez si li gen anyen nouvo pou'l rapote sou sityasyon 12 misyonè Ameriken gang 400 Mawozo a toujou kenbe, apre yo fin lage 5 pami misyonè sa yo nan semen ki sot pase yo.
"Mwen paka fè komantè sou kidnaping pou ranson," Misye Gonzalez reponn. "Se FBI ki jere sa. Mwen m'kapab di nou ke pa gen okenn priyorite ki pi enpotan pou Lezetazini pase sitywayen Ameriken kap fè fas ak risk yo. Donk se yon bagay ke vreman vre, nou te diskite pandan seri rankont nou te genyen jodia, e anbasad nou ap travay di sou sa. Nou gen tout kalite mezi nap pran pou asire ke moun sa yo tounen lakay yo sen e sof, kote fanmi yo ap tann yo."
Korespondan VOA nan Lamezonblanch, Jorge Agobian, kontribye a repotaj sa a.