Lidè militè kou deta ki te jete prezidan Gabon an, semèn pase a, prete sèman lendi kòm nouvo prezidan tranzisyon peyi a.
Jeneral Brice Nguema ranplase Ali Bongo, kote fanmi li te kenbe plas prezidan an depi plis pase yon demi syèk.
Nguema fè yon diskou ki pase sou televizyon apre yon seremoni prestasyon sèman.
Bongo pèdi pouvwa a, mwa pase, yon ti moman apre li fin deklare viktwa nan eleksyon prezidansyèl la.
Kou deta a sanble gen sipò moun ki te pran lari nan peyi Gabon pou selebre dechoukaj fanmi Bongo a.
Lidè yo nan loksidan wè sityasyon an yon lòt jan, men Josep Borell, ki se chef politik afè etranjè Inyon Ewòp la, di, "Natirèlman lidè kou deta yo se pa solisyon kriz la, men nou pa dwe bliye ke Gabon te gen yon eleksyon chaje ak bagay ki pa kòrèk."
Opozisyon an kwè se li ki vrè eritye eleksyon an e li mande sipò kominote entènasyonal la.