Imedyatman apre anons ofisyèl ki di ke Bongo ranpòte la viktwa a 64,27 % nan vòt yo nan lannwit Madi pou rive Mèkredi, yon gwoup apeprè yon douzèn sòlda te parèt sou ekran chanèl televizyon Gabon 24 la pou yo anonse fen rejim an plas la. Gen plizyè solda ki abrite nan Prezidans lan menm.
Sou chanèl leta a yon kolonèl nan lame a te anonse "Nou menm, fòs defans ak sekirite, nou reyini nan mitan Comité pou la transition et la restauration des institutions =CTRI), nan non pèp Gabonè e pou garanti pwoteksyon enstitisyon yo, nou deside defann lapè e mete fen ak rejim an plas la ".
Li te ajoute."Pou sa ka fèt, eleksyon jeneral ki te fèt nan dat 26 out 2023 yo ak tout fo rezilta yo a anile".
Pami sòlda yo te gen manm Gad Repibliken an (GR), yon inite elit ak Gad Pretoryen nan prezidans la, osi byen ke sòlda regilye lame ak ofisye lapolis.
Koudeta sa a rive nan moman te gen yon kouvrefe e sèvis entènèt la te koupe nan tout peyi a, swit ak mezi gouvènman an te dekrete samdi anvan fèmti biwo vòt yo pou anpeche, daprè li, difizyon "fo nouvèl". . ak posib zak "vyolans".
Yon ti tan apre yo fin li deklarasyon sòlda yo, jounalis AFP yo te tande kout zam otomatik ki tap chante nan plizyè katye nan Libreville.
Sòlda yo te konsidere ke fason yo te fè òganizasyon eleksyon yo "pa ranpli kondisyon pou bilten vòt la te transparan, kredib ak enklizif ".
Yo denonse "yon gouvènans irèsponsab, enprevizib, ki lakòz yon deteryorasyon kontinyèl nan jwenti sosyal, ki riske mennen peyi a nan dezòd".
