Reyaksyon sou lanmò Madeleine Albright, premye fanm ki okipe pòs sekretè d'eta Etazini tonbe tou swit apre fanmi li te anonse Mèkredi ke li mouri ak kansè a laj 84 an.
"Madeleine Albright te yon fanm vanyan. Men li te chanje paj listwa. Etazini pat gen yon pi gwo chanpyon demokrasi ak dwa moun pase Sekretè Albright, yon moun mwen te konnen pesonèlman e ki te ekri tèks sou danje otokrat yo poze pou mond lan. Lè mwen panse a Madeleine, mwen pral toujou sonje konviksyon li dèske "Etazini se yon peyi endispansab." - Prezidan Joe Biden
"Madeleine Albright te yon diplomat briyan, yon vizyonè, yon fanm vanyan, yon patwon ki te gen anpil dedikasyon pou travay li, yon bon moun, yon gran pèsonaj ki te renmen Etazini ak tout kè li epi devwe lavi l pou rann peyi a sèvis." - Sekrete D'Eta Antony Blinken
"Pa gen anpil lidè ki te parfè pou pòs yo te okipe nan epòk yo te okipe'l la... Paske li te konnen pa eksperyans desizyon politik Etazini yo gen pouvwa pou fè yon diferans nan lavi moun toupatou nan mond lan. Li te wè travay li tankou yon obligasyon ak yon opòtinite alafwa...E pandan karyè li, menm dènye konvèsasyon nou te genyen sa gen 2 semèn, li pat janm pèdi sans imou li ni detèminasyon pou l al mete bòt li nan pye l, apiye Ikrèn nan lit li pou prezève libète ak demokrasi." - ansyen Prezidan Bill Clinton, ki te nomen Albright kom sekretè d'eta an 1996
"Youn nan istwa mwen pi renmen yo: Pandan yon seremoni natiralizasyon, yon Etyopyen te pwoche bò kote Madeleine e li deklare "Se sèlman Ozetazini ke yon refije Afriken ka rankontre Sekretè d'Eta." Li te reponn 'Se sèlman yon refije Ozetazini ki soti Amerik Santral ki ka tounen Sekretè d'Eta." - ansyen Prezidan Barack Obama
"Li te viv rèv Ameriken an e li te ede lot moun reyalize l tou... Li te sèvi ak distenksyon antanke minis afè etranje ki pa pran nesans Ozetazini e ki konprann byen enpòtans sosyete lib yo pou prezève lapè nan mond lan. Mwen respekte lanmou li pou peyi a ak sèvis piblik li e mwenmenm ak Laura nou trè rekonesans dèske Madeleine Albright te zanmi nou." - ansyen Prezidan George W. Bush
"Li kite yon mak pèson paka efase sou mond lan ak Nasyonzini. Peyi nou ak Nasyonzini pran fòs gras ak sèvis li." - Anbasadè Ameriken nan Nasyonzini Linda Thomas-Greenfield
"Soti depi nan koulwa Nasyonzini pou rive nan lidèship Depatman d'Eta a ak travay li toupatou nan mond lan, Madeleine Albright te yon fanm vanyan, yon modèl, yon chanpyon aksyon miltilateral ak kowoperasyon entènasyonal." - Sekretè Jeneral Nasyonzini Antonio Guterres
"Jodia peyi nou ak mond lan pèdi yon kokenn poto mitan lapè, diplomasi ak demokrasi: Sekretè Madeleine Albright. Pozisyon istorik li kòm premye fanm peyi nou ki sèvi kòm diplomat pi wo plase trase chimen an pou yon jenerasyon fanm sèvi peyi a nan nivo pi wo plase gouvènman an epi reprezante Etazini lòt bò dlo... Avètisman li lanse sou otokrat kap pran fòs toupatou nan mond lan rete kòm gid enpòtan ak resous nan moman nap travay pou defann demokrasi lakay nou ak lòt bò dlo." - Lidè La Chanm dè Reprezantan Nancy Pelosi
"Mwen pral toujou rete trè rekonesant pou bèl amitye Bill avè'm te genyen ak Madeleine ak konsèy saj li te pataje avè nou pandan tout ane sa yo. Anpil moun toupatou nan mond lan ap viv pi byen gras ak sèvis li rann peyi nou." - ansyen Sekretè D'Eta Hillary Clinton