WASHINGTON, DC —
Prezidan ameriken an, Donald Trump, ap rete tann pou wè si repons alekri li bay pou kesyon pwokirè jeneral Robert Muller, konsènan yon entèferans posib Larisi nan eleksyon prezidansyèl novanm 2016 la Ozetazini, pral evite yon entèvyou an dirèk avèk anketè espesyal la. Se premye fwa Misye Trump kowopere avèk ankèt sa a ki sou pye depi lontan deja.
Biwo Misye Mueller la te dakò pou l resevwa repons ekri pou kesyon ki gen rapò avèk yon konnivans kèlkonk ant responsab kanpay elektoral Trump la avèk otorite yo nan Moskou pou enfliyanse rezilta eleksyon an; genyen tou kesyon konsènan yon ankèt k ap fèt pou konnen si prezidan ameriken an te eseye bloke travay lajistis ap fè sou dosye a.
Pwokirè jeneral Robert Mueller. (Foto Achiv).
Pandan Misye Trump t ap pale ak laprès semèn pase a, li te deklare se li-menm pèsonèlman, e pou kont li, ki te prepare repons yo. Sepandan, jiskaprezan Misye Mueller gen dwa fè prezidan an obligasyon pou l prezante devan li pou l reponn kesyon yo an dirèk si pwokirè jeneral la panse repons yo pa ba l satisfaksyon.