Lagè La Risi ap mennen nan Ikrèn -- youn nan pi gwo ekspotatè ble nan mond lan gen konsekans sou peyi toupatou. Ikrèn tap ekspote yon afè 5 milyon ton ble anvan lagè a, men kounyea sa vinn redwi a 500,000 ton pa mwa sèlman.
Ayiti, achte ble pa li nan men Etazini, Kanada, Poloy ak La Risi. Sanksyon l'Oksidan enpoze kont pwodwi la Risi ekspote yo komanse gen move konsekans sou komèsan Ayisyen ki vann manje ki fèt ak ble.
"Bon efektivman li fè gwo enpak sou nou," boulanje Mandais Ednor di VOA, " paske ble a se la li soti dirèkteman pou fè farinn nan. Alo pa rapo ak gè a, sa paka travèse Lètazini li oblije pèmèt ke farin nan ogmante nan yon pri ki wo, kivledi li gen enpak sou tout bagay."
Your browser doesn’t support HTML5
Konfli Ikrèn nan Gen Move Konsekans sou Manje Ayisyen pi Adore
Boulanje a di leta Ayisyen pa fè ase pou ankadre sektè pa li a, ki gen yon enpotans total kapital pou pèp Ayisyen an.
"Men boulanje jwe yon gwo wol nan peyi a paske se premye nouriti ou itilize le maten," misye deklare. "Men se nou yo plis pa ankadre. E se si ke tout boulanje yo ta pran desizyon pou yo kanpe ak enstan ke m ap pale ansanm avèk ou la a, peyi a ap kraze plat."
Boulanje a di pou kontrekare rate ak pri farin nan, olye li vann machandiz li pi chè, li deside fè posyon pen lap vann yo pi piti.
"Pen an paka monte se pi piti nou fè'l. Noumenm nou rive nan yon moman la a nou paka koupe l pi piti anko paske nou prèt pa wè sa nap koupe a. M'ta swete moun ki an plas yo di yon mo pou nou, paske si se pa sa - nap femen," li deklare.
Nou koze tou ak yon machann pate ki di pri farin nan trakase'l anpil.
"Farin nan chè m'san lè kite li paske farin nan two chè. Farin nan ak lwil la, le wap fè pate se nan farin nan nou wetire tout bagay nèt," li esplike VOA. " Lè ke wap fè'l la ou pa jwenn avantaj ladann. (Men) nou abitye avè'l donk nou kontinye fè'l."
Envazyon La Risi nan Ikrèn te tanmen 24 Fevriye. Pou kounyea, pèsonn pa konnen kilè batay la pral fini epi soulaje sityasyon ble ak farin nan.